Atgyweirio eich eitemau sydd wedi torri, lleihau gwastraff a chefnogi'r economi gylchol
Ar 14 Mai cynhaliwyd Caffi Atgyweirio arall yn Ystafell Gemau Harbwr, Campws Singleton, mewn cydweithrediad â Chanolfan yr Amgylchedd. Daeth nifer fawr o bobl i'r digwyddiad, gyda thros 35 o eitemau’n cael eu hatgyweirio! Dyma ein pedwerydd Caffi Atgyweirio erbyn hyn, ac mae dyddiadau eraill yn cael eu cynllunio ar gyfer eleni ar ôl gwyliau'r haf.
Mae'r Caffi Atgyweirio yn dod â grŵp o unigolion crefftus ynghyd, sy'n gwirfoddoli eu hamser i atgyweirio eitemau sydd wedi'u torri, fel: dillad, eitemau electronig bach, caledwedd a meddalwedd cyfrifiadur, gemwaith, addurniadau ac eitemau pren, yn ogystal â chynnal a chadw a gwiriadau beiciau sylfaenol. Mae'r atgyweiriwyr yn gwneud eu gorau i atgyweirio eitemau am ddim! Y ffordd berffaith o leihau gwastraff, helpu'r amgylchedd a gwneud arbedion personol trwy estyn bywyd eich eitemau.
Mae’r Caffis Atgyweirio yn agored i holl fyfyrwyr a staff y Brifysgol. Gallwch sgwrsio â'ch cyd-fyfyrwyr a’ch cydweithwyr a mwynhau paned o de neu goffi wrth ddisgwyl. Bydd yr atgyweiriwyr yn dangos i chi sut i atgyweirio'r eitem os oes gennych ddiddordeb mewn gwybod sut mae’n cael ei wneud! Ffordd wych o rannu sgiliau. Dilynwch y Tîm Cynaliadwyedd ar Eventbrite i sicrhau eich bod ymhlith y rhai cyntaf i glywed am ddyddiadau Caffis Atgyweirio ar y Campws yn y dyfodol.
Rydym yn ddiolchgar i Ganolfan yr Amgylchedd a'u prosiect Mwy nag Ailgylchu Abertawe, sy'n ei gwneud hi'n bosib i ni gynnal Caffis Atgyweirio ar y Campws. Mae Canolfan yr Amgylchedd yn cynnal Caffi Atgyweirio misol yng nghanol y ddinas, sy'n agored i'r holl gymuned. Gallwch weld y dyddiadau sydd ar ddod yma.